الثلاثاء، 17 يوليو 2007

تاجات ؛؛؛؛ واعلانات ....


السلام عليكم ورحمة الله وبركاته

الصراحة عندى تاجااات منذ فترة ؛ محرجة جداا من أروى ومن الأخ امام الجيل والأخ محمد العنانى

على تأجيل الاجابات ؛

لكن ؛؛؛

كنت حقا مشغولة هذه الفترة دعواااتكم ؛؛؛

وهذا تاج أروى _ حسب الأقدمية _

المهم هذا هو التاج بين أيديكم :

أحب شخص لقلبك فى الدنيا؟!

أعتقد ماينفعش يبقى أحب _ بصيغة التفضيل _ لأنى أشعر بالحب تجاه الكثير:ماما _ ايمان أختى وطفلها الصغير _ آلاء _ أختى _ ومحمد أخويا

روميساء _ صديقتى التى لم أرها منذ أربع سنوات _ أخواتى فى الله ....

.وبجد ؛ كل انسان حمل هم الدعوة ...

.لكن لو شخص بعينه تظل الغالية ماما هى المتربعة على العرش_ الله يحفظها لينا ؛ ويبارك لها فينا _
انسان مستعد تضحي بحياتك – ركز فى كلمة حياتك - عشانه؟

رجالات الدعوة الذين يحملون هم الاسلام ويحيون من أجله .الشيخ القرضاوى _ حفظه الله _

والمربى الذى أدين له : محمد أحمد الراشد
انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

أعتقد مستحيل أصل لهذه الحالة مع شخص مسلم حتى ولو لم يكن له من اسلامه سوى الاسم لكنى مع كرهى الشديد لكل من يكيد للمسلمين فى كل مكان الا أنى أفضل أن أرى انتقام الله للمسلمين من هؤلاء ؛

لأنى أعتقد أن عقاب الله دائما أقسى مما يمكننا أن نتخيل _ ولهم فى شارون عبرة _
ما هو:اسم أجمل كتاب كتبه بشر قرأته ومحتفظ به حتى الان؟

هذه هى نقطة ضعفى لأنى عندما يعجبنى كتابا أحتفظ به ؛ لايمكننى أبدا أن أفرط به مهما كانت مكانة من يطلبه فى قلبى ؛؛؛

تظل كتب الشيخ الغزالى لها المكانة الأسمى فى قلبى ؛

أذكر لكم تحديدا كتاب ( جدد حياتك ) لأنه ضايع منى دلوقتى ؛ ومش عارفة ألاقيه !!!!

ورسالة سيد قطب ( أفراح الروح ).... لا أمل من اعادة قراءتها ...

.كل مايكتب العلامة محمد أحمد الراشد ؛ أنتظره بفارغ الصبر ...

.أحلى كتاب قرأته فى الفترة الأخيرة كتاب للشيخ القرضاوى ( الشيخ الغزالى كما عرفته رحلة نصف قرن ) الكتاب صدر فى حياة الشيخ _ غفر الله له _ تخيلو يعنى عندما يكتب الشيخ القرضاوى عن الشيخ الغزالى ...... هذا ما أسميه التألق ...
اسم كتاب -كتبه بشر برضة- انت متعلق بيه وبتقرأه كل فترة؟

انظر الاجابة السابقة ؛؛؛

وللأمانة عشقى للأدب يجعل كل رواية أو ديوان أقرأه أعيد قراءته مرة أخرى ...

ديوانى الشاعر المتألق محمد بن عبد الرحمن المقرن _ حفظه الله _مليكة الطهر ؛ و أنشودة الخريف

روايات الكاتبة خولة القزوينى تحديدا رواية ( عندما يفكر الرجل )

رواية : خطوات على سفوح المجد ؛

ومؤخرا لا أمل من حمل ( ونشتاق للبوح أحيانا ) لمحمد عبد الجواد
اهم جهاز منزلى انت متعلق بيه او بتستخدمه كتير؟

التسجيل ......... حد عنده مانع ؟!صحيح بحب الكمبيوتر جدااااا ؛بس التسجيل لايمكننى الاستغناء عنه .....فى الواقع لأسباب منزلية أكثر ؛ لأن الكمبيوتر فى منزلنا لايزال خاضعا للقرارات العائلية ؛ وعند أول خلاف عائلى يتغير مكانه ؛ فأعتقد _ ومع مكتبة الشرايط المتوفرة لدى _ يبقى التسجيل أضمن !!!
شىء تحس بالراحة النفسية عندما تنظر اليه؟

لا خلاف فى كونها الحبيبة ( الكعـــــبة )
مكان تحس فيه بالحنين الى شىء لا تدرى ماهو و ذكريات جارفة الى

لاشىْ

هناك مكان أحس بالحنين اليه وعندى فيه ذكريات أعيها جيدااااامدرستى ( الثانوية الثلاثون )

لكن الحنين الى لاشىء ؛ والذكريات الجارفة الى لاشىء

ربما يكون قبر والدى _ أسكنه الله الفردوس ؛ وجمعنا به هناااك _
مكان تحس بالراحة عندما تدخله؟

الحرم ؛مكة تحديداااااااااااااأحس بالأمان حينما أكون عند باب الملك عبد العزيز ولا يفصلنى عن رؤية الكعبة الا خطوات ...ياااااااااااااااااااااااااااااارب : يسر لى عمرة قريبة ..... يااااااااااااااااااااااااااارب
اجمل مدينة زرتها داخل مصر؟

لم أزر فى مصر مدن كثيرة ؛ لم يسعفنى الوقت المزحوم دااائما بجداول المذاكرة أن أزور مدن مصرية كثيرةلكنى _ وعلى خلاف مع الكثيرين _ أحب القاهرة .... أيوه حد عنده مانع ؟زحمة وحر وقرف ... بس بحبها
أجمل مكان طبيعي رأيته داخل مصر ؟

كل لما أتمشى على النيل فى أى مكان فى مصر بحس ان ده أجمل مكان طبيعى ؛؛؛
شخصية كارتونية بتحبها؟

توم وجيرى بحب أتفرج عليهم بس بالمجمل مابحبش الكارتون أوى

لكن طبعا أيام الطفولة كنت بحب ( ماوكلى - فتى الأدغال _ وشفت سيمبا حبيته برضه وحياة حشرة )
نوع هاتفك المحمول؟

نوكيا 6680
سرعة بروسيسور جهازك؟
مالييش فى الحاجات دى
حجم ذاكرة –هارد- جهازك؟

برضه معرفش ... هعرف ازاى الحاجات دى !!!
المساحة التى تشغلها المواد الاسلامية على جهازك؟

شوفو جهازنا ده من وأنا فى تانية ثانوى يعنىحوالى 7 سنوات _ ربنا يديله الصحة كمان _فتقريبا مفيش حاجة عليه ؛ بعض الألعاب علشان محمد أخويا ؛ وبعض حلقات أ . عمرو خالد على خطى الحبيب ؛ وبعض الأناشيد وبسسس ؛ أعتقد هو لا يتحمل لأكثر من ذلك ؛ فاللى عايزينه بنشوفه من النت بس كده .

نفس المساحة السالف ذكرها فى قلبك -الاجابة لنفسك عشان الرياء يا اخواننا -؟

فاذا ... الاجابة لنفسى .... يارب الهمنى الحق ؛ وثبتنى عليه ؛ وارزقنى الاخلاص ...

أهم هدف انت واضعه لحياتك الآن؟

الهدف المرحلى اللى حاسة انه ممكن مايتحققش السنة دى مش عارفة ليييه ( انى أنجح فى الدراسات العليا السنة دى ... دعواااتكم )والهدف اللى لسه داخل حياتى مؤخرا : انى أحاول اعادة برمجة ذاتى على تقبل فكرة الزواج نفسها ؛ واعادة قراءة ماقرأته حول البيت المسلم والأسرة المسلمة ..... ربنا يعيننا ... دعواتكم معانا ... وهمتكم أيضا اللى عنده كتاب حول هذا الموضوع يرشدنى اليه

.الهدف الأهم فى حياتى : انى أحاول _ من مكان عملى _ أوصل الاسلام السهل الصالح للتطبيق فى كل زمان ومكان الى أكبر قدر من المتلقين .... هنا بقى دعواااااااااااااتكم فعلاااااا
مواصفات فتى الأحلام بالنسبة لك؟

الصراحة السؤال ده بحس انه شخصى جداااا ويفتح مجال للتفكير من الأفضل أن نظل مبتعدين عنه ولا ينبغى الاجابة عليه ... مع الاعتذار
صف ما يأتى:شعورك لما بتسمع كلمة مصر ؟

أحبك لا تفسير عندى لصبوتى ،،، أفسر ماذا والهوى لايفسر ؟؟
شعورك لما بتسمع كلام عن اليهود؟

اليهود مجتمع زيه زى أى مجتمع فى منه بنى آدمين وناس غير آدميين بالمرة .... عادى ؛ أحترم الناجح وأحتقر ماعداه ....
شعورك لما بتشوف ظابط شرطة؟

فى الآونة الأخيرة بقيت بتخنق لما أسمع سيرتهم ؛ بس فى أحيانا ناس منهم كويسين جداااا ... لكن دول من ليس لهم صوت هنا ...
شعورك لما بتشوف الكناس العجوز فى الطريق؟

دائما بتساءل عن أولاده ... أين هم ؟ وهل يذهبون الى يديه يقبلوها ؛ وقدميه يتمرغون تحتها ؛ أم أنه يستجدى أحدهم ليكلمه .... غالبا ماتراودنى هذه الفكرة ... لكنى أحس دااائما أنى أريد أن أذهب اليه ؛ أقبل يديه وأشد عليها وأقول : لولاك لما استطعنا أن نحيا ...
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

فى السعودية كنت بطير من الفرح لما أشوف حد بالوصف ده ماشى فى الشارع ؛ بصورة أكثر دقة كنت أشعر بكثير من الفخر .هنا : لا زلت لا أدرى ؛ لكنى مع احساسى ذلك بالسعادة والفخر ينتابنى دعاء أن يمن الله علينا جميعا بالفهم الصحيح لتطبيق السنة ؛
احساس يراودك فى اشارة مرور مغلقة بسبب مسئول كبير؟

هيا حصلت مرة واحدة ؛ وكنت راكبة تاكسى ؛ قام عمو السواق صاحب التاكسى قال : احنا اللى خليناهم يعملو فينا كده ...ولا يزال لدى هذا الاعتقاد ؛ أننا من سمحنا لهم بأن يعاملونا هكذا ؛ كأننا مجرد قطيع فى حظيرة أجدادهم !!!!
**************

والآن تاج امام الجيل ؛ ومحمد العنانى :

السؤال الأول :

انت مين ؟

ربما لا أستطيع الاجابة عن سؤال كهذا ؛ بل يستطيع الآخرون الاجابة عنه ؛ لأنهم ربما ينظرون الى نظرة مختلفة عما أنظر لنفسى بها ؛؛؛

لكن يمكننى القول عن نفسى :

فتاة عادية ؛ امتن الله على بأب _ رحمه الله وأسكنه فسيح جناته _ استطاع خلال 9 سنوات هو عمرى الذى قضيته معه ؛ أن يبذر فى قلبى حب الله ؛ وحب الاسلام ؛ معنى أن أكون على صلة بالله .... استطاع أن يغرس هذا جيداااا

ثم امتن الله على مرة أخرى بأم _ حفظها الله _ استطاعت أن تربطنى بالدنيا ذلك الربط غير المخل بالدين بل المتوازى معه ؛ الذى يلتقى ولا يفترق ؛؛؛

استطاعت أن تفهمنى أنه معنى أن أحب دينى أن أبذل ما أستطيع من أجله ؛ والمجتمع لايقبل هذا أبدا الامن ناجح ؛

فلكى تخدمى الاسلام كما تريدين انجحى فى حياتك ....

غرزت فى هذا الأمر مذ توفى والدى _ عليه رحمة الله _

فكنت أنا ؛ نتج تمازج رائع بين أب وأم امتن الله على بأن جعلنى من ذريتهما ؛؛؛؛

أنا ........... فتاة عادية أحمل من اسمى الكثير ( أمل ) سمانى والدى أملا لكى أكون أملا للعالم الاسلامى _ هكذا كان يخبرنى ؛ وهكذا تخبرنى والدتى _ آمل أن لاأخفق فى تحقيق أمانيهما ؛

اسمى أمل ؛ ومن هنا ؛ أخذت على عاتقى أن أزرع الأمل فى نفوس كل من أقابل ؛ وكل من أعرف ؛؛

وآمل أن أنجح فى هذا .....

السؤال الثانى :

مين أكتر ست شخصيات بتحبهم ؟

أعتقد هذا السؤال متشابه مع سؤال أروى ؛ بس مفيش مانع نكرر الاجابة ؛مع حذف الأقارب والأصدقاء ؛ لأن شخصية دى معناها شخصية عامة ؛

الشيخ القرضاوى _ حفظه الله ورضى عنه وأرضاه _

المشعل الخالد ( خالد مشعل )

سماحة السيد ( حسن نصر الله )

المبدع : محمد أحمد الراشد

د. راغب السرجانى

كل أهل شنقيط ( المدينة الموريتانية ) وكل علماء شنقيط _ بارك الله حلهم وترحالهم _

كل رجالات الدعوة الذين مر اسمهم بخاطرى ( الشيخ سلمان العودة ؛ الشيخ عائض القرنى ؛ والشيخ على القرنى ؛ ود. عبد الرحمن العشماوى ؛ ومحمد المقرن ؛وعبد الملك القاسم ؛ ........ هؤلاء من أتذكرهم حاليا ؛

لكن القائمة طويــــــــــــــــــــلة ؛

السؤال الثالث :

انت سعيد ؟

الحمد لله رب العالمين ؛ امتن الله على بنعم لاتعد ولا تحصى ؛ فمن شكر النعمة أن أسعد بها ؛؛؛

هو الصحيح ( تعب كلها الحياة ) ولقد خلقنا الانسان فى كبد ؛؛؛

لكنى أحاول دائما أن أكون سعيدة ؛؛؛

وأجد ذلك حين تحط قدماى فى مسجد _ أى مسجد _ وحين أقابل اخوتى فى الله ؛؛؛

لكن تظل السعادة :ممشاعر زئبقية نحاول الامساك بها ؛ ونحاول ؛

ولكنها : غالبا ماتفلت منا ....

أسعدكم الله جميعاااااااا

السؤال الثالث :

لو أجتمعت أنت وحسنى مبارك فى غرفة واحدة هتقوله ايه؟

هل يمكن تأجيل اجابة هذا السؤااال ؟؟؟؟؟؟

ورق تعيينى فى الأمن ؛ وأنا هذه الأيام أعيش دور المواطن الصالح ....

السؤال الرابع :

لو معاك نصف مليون هتعمل بيهم ايه ؟

مليون أرسله لاسماعيل هنية _ بس أتأكد انه يوصل ليده _ وهو يتصرف بيه ....

وجزء من النصف مليون أفتح بيه مركز كبير لتعليم وتربية الفتيات تربية ايمانية ونفسية وحياتية ؛ لأنا نفتقد مثل هذه المشاريع الخاصة بالبنات فى مصر ؛

والجزء الأخير أمول حلم أختى _ دار تصميم أزياء للحجاب الشرعى _ .....

لكن : ماكل مايتمنى المرء يدركه !!!!!!!!!!!

السؤال الخامس :

بتحب مصر ؟

فى عاقل يسأل السؤال ده ؛

طبعاااااااااااااااااااااااااا

أموت عشقا فيها ؛

مصر بالنسبة لى ؛ الوطن ؛

وطنى الأول : مكة طبعااا

لكن مصر الأمان والوطن ؛

وأنا فى السعودية أخذت كيس تراب معايا هناك ؛ كل لما كانت بتوحشنى كنت بطلعه !!!!!

وأنا برضه فى السعودية وأنا فى سنة تالتة ابتدائى مع بابا _ الله يرحمه _

كان بيقرأ لى درس عربى فيه شعر :

اسلمى يامصر اننى الفدا ؛؛؛؛ ذى يدى ان مدت الدنيا يدا ...

لقيت نفسى ببكى ؛ وأبكى ؛

وقلت له : انت جايبنا هنا ليه ؟ نزلنا مصر ..... مش عايزين نعيش هنا ... أنا عايزة بلدى ........

واحنا فى السعودية برضه وأنا فى تالتة اعدادى : كنت بنشد للبنات النشيد الوطنى بتاعنا _ وفى كتير أوى كانو بيتأثرو ا من تأثرى ؛ لدرجة ان مرة فى واحدة معايا فى الفصل بكت ؛ لتأثرى ؛ واشتياقى ...

ثم يأتي أحدهم ليقول :

بتحبى مصر ؟؟؟؟؟؟

السؤال السادس :

بتحب البنات ؟

وفى حد مش بيحب نفسه ؟؟؟

ايه السؤال العجيب ده ؟

انت مسلم ؟

أنا مسلم ؛ ولى الفخار فأكرمى ؛؛؛؛ ياهذه الدنيا بدين المسلم

وأنا البرىء من المذاهب كلها؛؛؛؛؛ وبغير دين الله لن أترنم

ولتشهد الأيام ماطال المدى ؛؛؛؛ أو ضم قبرى بعد موتى أعظمى

أنى لغير الله لست بعابد ؛؛؛؛ وبغير دستور السما لن أنتمى .

السؤال الثامن : ليه ؟

امتن الله علي بأغلى نعمه ؛ أن خلقنى لأب وأم مسلمين ....

فكيف أتعامل مع نعمه سبحانه ؟!

هل لا أقبل من الله هديته ؟!!!!!

وأنا مسلمة الآن ؛ لأنى أجزم أن الاسلام هو الدين الصحيح الوحيد المتوافق مع طبيعة البشر ؛ والصالح للتطبيق فى كل مكان وزمان ....

ومما زادنى شرفا وتيها ؛؛؛؛ وكدت بأخمصى أطأ الثريا

دخولى تحت قولك ياعبادى ؛؛؛؛ وأن صيرت أحمد لى نبيا ...

فاللهم لك الحمد ؛ حمدااااااااااااااااااا

حتى ترضى ؛ ملء السماوات وملء الأرض وملء مابينهما على هذه النعمة العظيمة ....

السؤال التاسع :

ايه أكتر موقف محرج اتعرضت ليه ؟

لالالالالالالالالالالالالالا

ده كتير أوى مايتعدوش ؛

بس مفيش فى ذهنى حاجة معينة دلوقتى .

السؤال العاشر :

اتصرفت ازاى ؟

غالبا فى المواقف دى ؛ بضحك ؛ علشان أعدى الموقف ؛ مع انى ببقى جوايا بغلى ؛ بس بقوم ضاحكة ومعدية الموضوع ؛؛؛؛

السؤال الأخير :

ايه الأمنية اللى بتتمنى ان ربنا يحققها لك ؟

كتير برضه ؛

بس أتمنى انى أكون مسلمة بحق أحمل هم الاسلام ؛

وانى أكون مربية ناجحة قبل أن أكون أستاذة جامعية ؛

وانى أكون زوجة صالحة تعين زوجها على الخير ؛

وانى _ اذا رزقنى الله بذرية _ أستطيع تربيتهم كما ربانى أبوي ....

وجماع ذلك كله

(((((((((((((( الجنة ))))))))))))))))

هذه هى أمنيتى الحقيقية .......

رزقنا الله ذلك واياكم ؛؛؛؛

أمرر التاج بقى ؛ لآية ( صوت عصفورة علشان هيا بتحب التاجات انتو عارفين )وللأستاذة أسماء ( همسة قلم ) يعنى ياسمسمة تفاؤلا بمستقبل صحفى واعدولسناء الحبيبة ( سنا الاسلام )ولآية ( همساية ) بس لما ترد على التاج اللى فات الأول ....

وللؤلؤة أختى ؛ ولمنار ومحمد مجدى ولجهاد ( النجمة الصامدة )

و لأسماء ( اخوانية مصرية )

*********

اعلانات ..... اعلانات .......اعلانات ..............

أختى الصغيرة ؛ مازلت ألح عليها أن تفتح مدونة حتى اذا فتحتها ؛ لم أعلنها لها ؛

الآن أنا أعتذر لحبيتى على التأخير ؛

وأزف للجميع بشرى افتتاح مدونة أختى تلميذتى التى تفوقت على أستاذتها كثيرااا

باركها الله وسدد خطاها ؛

مدونتها اسمها


والمدونة الأخرى ؛ لأختى التى ولدتها أمى الأخرى ؛ مدونة المنارة التى هى بحق منار اسما ومسمى ؛

ومدونتها


ارفعوا همهم شوية ؛ لأنهم بجعبتهم الكثييييييييير ؛

وبامكانهم أن يقدمو الكثير ؛ فقط مع بعض التشجيع !


ملاحظة :
الصورة التى فوق ؛ هى لقصر الحمراء ؛ من الأندلس ؛؛؛
ولا تعليق !!!!!!!!!!!!!!

هناك 29 تعليقًا:

ma 3lina يقول...

السلام عليكم ورحمة الله وبركاته ..
إجاباتك متميزة بارك الله فيكي وثبتك ورزقك كل أمانيكي ..
لكن هو إيه الفرق بين ملتحي السعودية وملتحي مصر ؟
:)

Alaa يقول...

ربنا يحققلك كل أمانيكي يارب

غير معرف يقول...

سلام عليكم
اجابات جميلة جدا و الله
و ألف مبروك لأختك على المدونة دي
و يارب يعدي ورقك من الامن على خير
و:D حاجه تانية هعلق عليها بعدين
و بس
سلام

ياسر سليم يقول...

إجابات جميلة

وانا فى الطريق لزيارة

المدونتين

belal يقول...

إجابات جميلة :)

ولو أنه كتنير كل التاجات د
ي مرة واحدة
..
وألف مبروك لأخت حضرتك عل المدونة
...

همسة قلم يقول...

ماشاء الله ياامل
اجبات جميلة بالفعل ربما عرفتني اكثر عليكِ ربما اكثر مما قابلتك وحدثتك على الماسنجر
صدق من قال تكلم لكي اراك :)

اما بقى التاجين فاتأخر اوي تمريرهم ياقمر :)

هتلاقي اجاباتهم من زماااان على المدونة
:)

اسماء العريــان يقول...

ما شاء الله .. اجاباتك جميله

غير معرف يقول...

من شعر أحمد فؤاد نجم


ياشعبي حبيبي ياروحي يابيبي ياحاطك في جيبي يابن الحلال

ياشعبي ياشاطر ياجابر خواطر ياساكن مقابر وصابر وعال

ياواكل سمومك يابايع هدومك ياحامل همومك وشايل جبال

ياشعبي اللي نايم وسارح وهايم وفي الفقر عايم وحاله ده حال

احبك محشش مفرفش مطنش ودايخ مدروخ واخر انسطال

احبك مكبر دماغك مخدر ممشي امورك كده باتكال

واحب اللي ينصب واحب اللي يكدب واحب اللي ينهب ويسرق تلال

واحب اللي شايف وعارف وخايف وبالع لسانه وكاتم ماقال

واحب اللي قافل عيونه المغفل واحب البهايم واحب البغال

واحب اللي راضي واحب اللي فاضي واحب اللي عايز يربي العيال

واحب اللي يائس واحب اللي بائس واحب اللي محبط وشايف محال

واحبك تسافر وتبعد تهاجر وتبعت فلوسك دولار او ريال

واحبك تطبل تهلل تهبل عشان مطش كوره وفيلم ومقال

واحبك تأيد تعضض تمجد توافق تنافق وتلحس نعال

تحضر نشادر تجمع كوادر تلمع تقمع تظبط مجال

لكن لو تفكر تخطط تقرر تشغلي مخك وتفتح جدال

وتبدأ تشاكل وتعمل مشاكل وتنكش مسائل وتسأل سؤال

وعايز تنور وعايز تطور وتعمللي روحك مفرد رجال

ساعتها حجيبك لايمكن اسيبك وراح تبقى عبره وتصبح مثال

حبهدل جنابك وأذل اللي جابك وحيكون عذابك ده فوق الاحتمال

وامرمط سعادتك واهزأ سيادتك واخلي كرامتك في حالة هزال

وتلبس قضيه وتصبح رزيه وباقي حياتك تعيش في انعزال

حتقبل ححبك حترفض حلبك حتطلع حتنزل حجيبلك جمااااال

مشروع انسان يقول...

بسم الله ما شاء الله اجابات بحق رائعة وبليغة جدا غلب عليها الرد الادبى لكن ازعجتنى اجابة واحدة عدم تقبل فكرة الزواج نسال الله ان يلهمك الى الخير فهذه فطرة الله التى وضعها فينا فارجو الا يكون قد كدرها شئ بالتوفيق

إخوانية مصرية يقول...

ياحاجة
هيه هيصة
التاج دا جالي من زمان
بس اجابات ميه ميه
هجاوب علي التاج الاولين
بس التاني جالي من زمان
لما افضي بقي
اصل مسغولة جداا
سلامي لخالتوا
ولمحمد
والاء لااااااء

momken يقول...

فى الحقيقه انا مش عارف الى بيعتوا التاجات بيستفيدوا ايه
هل هى حب استطلاع دى الواحد لو هيتجوز وحده مش هيسال كل الحجات دى

طيب الى بيطتب الاسئله دى كلها بيستفيد ايه عنده وقت يعنى وحب يهلكه

بصراحهه فكرت كتير فى موضوع التاج ده ومفهمتش المقصود منه ايه خالص
على العموم اجاباتك دبلوماسيه ودمها خفيف
تحياتى

عمر عاشق القرآن يقول...

انتى مزهقتيش من الاجابة على الأسئلة دى كلها ؟؟

بس تحسى في الاجابات بالصراحة

يلا بارك الله فيكى

Rehab Saber يقول...

اجابات جميلة تبارك الله

Aml Ghonaim يقول...

ماعلينا :
وعليكم السلام ورحمة الله وبركاته ؛
جزاكم الله خيراااا؛
وبارك الله فيك ...
بالنسبة للفرق ؛ لايمكننى أن أجزم تحديدا ؛ لكنى كنت أشعر تجاه ملتحى السعودية بالفخر ؛
أما هنا ...
ربما لأن هناك اللحية تعبير حقيقى عن الالتزام بالدين ؛
أما هنا فهى مرحلة أولى فى الالتزام _ والأهم أن صاحبها يعتقد أنه بلغ ذروة الالتزام باطلاقه للحية _بينما لايزال أمامه مراحل كثيرة ؛
قد يكون هذا هو السبب ؛؛؛ ربما ! ...
جزاكم الله خيرا على المرور ؛؛؛



علاء :
اللهم آمــــــين ؛ وربى يحقق لك أمانيك أنت أيضا ...



عياش :
وعليكم السلام ورحمة الله وبركاته ؛
بارك الله لك ...
ويارب يعدى الورق على خير فعلا ..
ننتظر بقية التعليق ......

Aml Ghonaim يقول...
أزال المؤلف هذا التعليق.
غير معرف يقول...

امل حبيبتى

وحشاااانى يا امل وانا دلوقتى ماسكة التليفون بكلمك وبدعى تردى
عشان وحشانى

اما بالنسبة للاجابات فجميلة واثر فيه جدا بتاعت ابى وامى وما ذكرتى حول التعلق بالله والنجاح فى الدنيا وفهمهما بما لا يخل من صلتنا بالله

ربنا يرحمه رحمة واسعة ويبارك لك فى مامتك

وورقك يعدى لحسن كل شوية اخت تقف فى موضوع الورق ده ونعد ندعيلها

بس هتعدى ان شاء الله

سلاااااام
الى ان اسمع صوتك فى التليفون

BinO يقول...

السلام عليكم ورحمة الله وبركاته
كل ده تاج وصلت هنا بعد كتييييييييييير
بالنسبة لموضوع اللحي
أنا أختلف معكي تماماً في التفصيل
وده كلام مش مني
ده من ناس عاشوا هناك

ma 3lina يقول...

أنا احتج ..

:D

شوفي يا ست الدكتورة .. حضرتك افتخري بأي حد بيعمل طاعة لله حتى لو كانت حاجة صغيرة جدا أو ظاهرية ..

وحسن الظن يقتضي إنك تفرضي في أي أحد ملتحي أنه أطلقها طاعة لله .. ما دمنا مش بنحلل بواطن الناس ..

ويكفي ما يلاقيه ملتحي مصر من متاعب إن لم يكن أكمل مراحل الالتزام فلعل هذه المتاعب وصبره عليها ترفع درجاته ليقف في مصاف من أكمل تلك المراحل ..

أشعر بالغيرة مختلطة بالحزن وعليها قليل من الغضب ..

عن إذنك بقى عشان حروح ابكي على حالي

Aml Ghonaim يقول...

ياسر سليم :
جزاااااااكم الله خيرا؛؛؛
وكافأك على عطائك ؛؛؛
بارك الله لك ...



بلال :
صح هيا كتييير أوى ؛
والله يبارك فيك ...




أسماء :
تسلمى ياعسل على الاطراء والكلمات التشجيعية ؛؛؛
ربنا يبارك فيك ؛ ويحفظك ليا ؛؛؛
ويحقق لك كل أمانيك ....

Aml Ghonaim يقول...

أسماء 2 :
بتنورى المدونة باطلالتك الهادئة ....
بارك الله لك ؛ ويسر لك كل أمورك ....



امام الجيل :
أكرمك الله ؛
فكرة الزواج كنت أجلتها من حساباتى فى الوقت الحالى ؛ ليس الا ؛ لكن قدر الله أمرا غير هذا ؛ والآن أنا أكثر تقبلا لها ؛؛؛
جزاكم الله خيرااااااااا



أسماء 3 :
بس الآء بتسلم عليك ؛ نعمل ايه بأه ؟!
تسلمى ياجميل ؛؛؛
وجاوبى على التاج بأه عايزين نشوف ابداعات ....

Aml Ghonaim يقول...

ممكن :
موضوع التاجات دى أكبر دليل على ان الانسان كائن اجتماعى بطبعه ؛ وفضولى أيضا ؛ لايكتفى بما يظهر الآخر ؛ بل يريد أن يعرف أكثر ....
هذه طبيعة !!!!
ولو انه تقليد جميل دلوقتى ؛
بارك الله لك ....



البطل عمر :
انا جاوبت على تاج أروى الأول ؛ بس مش فضيت أنزله ؛ فنزلته مع التاجين التانيين ؛
يعنى حد بيزهق من الكلام عن نفسه ؟!!!!
جزاك الله خيرااا على المرور ...



بنوتة عربية :
وحشتينى ؛
افتقدت مرورك البسيط ذلك ...
الله يبارك لك ؛ ويسعدك دااائما ...

Aml Ghonaim يقول...

أسماء 4 :
ايه كل دى أسماءات ؛ مفيش أسامى تانية ولا ايه ؟ هههههههه
ربنا يبارك لك ياعسسسل ؛ ومستنية أشوفك بكرة باذن الله ....
ربنا يرحم والدى رحمة واسعة ؛ ويلحقنا به فى الجنة _ اللهم آمـــــــين _
ويبارك لنا فى والدتى ؛ ولا يحرمها أجرنا ....
ويبارك لك فى والدك ووالدتك ؛ ويفك أسر والدك قريبا ...

Aml Ghonaim يقول...

بينو :
هو فعلا طويل أوى ماحسيتش بكده غير بعد لما نزلته ؛؛؛
بس يلا استحملو شوية ...
بالنسبة لموضوع اللحى :
ربما لأنى لم أتعامل معهم هناك تعاملا مباشرا بل كنت أراهم عن بعد ؛
وأسمع عنهم كذلك ..
أما هنا فقد رأيت من استطاع أن يغير هذه الصورة ؛ قد يكون هذا ....
لكنى الآن فى طور تغيير رأيى بخصوص هذا الأمر ... خاصة بعد كلام الأخ : ماعلينا ...



ماعلينا :
صدقا ... أثرت فى كلماتك تلك ؛
افترضت _ من نفسى _ سوء النوايا دون تثبت ؛ اللهم انى أستغفرك وأتوب اليك ....
وحقا : يجب أن أفتخر بكل من يحاول الطاعة فى زماننا هذا ؛ بدلا من محاولة تبرير أفعالهم ؛ ؛؛ أو الدخول الى قلوبهم ....
جزاكم الله الجنة ...
ورفع عنا _ فى مصر _ كل مايحاول أن يبعدنا عن ديننا ...
بارك الله فيك .....

مشروع انسان يقول...

يدعوكم موقع مدون خانه (تحت الانشاء)الى الاجتماع من اجل الاتفاق على الخطوات النهائيه لنشاء مجمع المدونين (مدون خانه)وذلك يوم السبت القادم الموافق 28 / 7 / 2007 وذلك الساعه 6 مساء يوم السبت فى مركز العربى للدرسات العنوان 23 شارع باهر زغلول من شارع المنيل

مشروع انسان يقول...

يدعوكم موقع مدون خانه (تحت الانشاء)الى الاجتماع من اجل الاتفاق على الخطوات النهائيه لنشاء مجمع المدونين (مدون خانه)وذلك يوم السبت القادم الموافق 28 / 7 / 2007 وذلك الساعه 6 مساء يوم السبت فى مركز العربى للدرسات العنوان 23 شارع باهر زغلول من شارع المنيل

BinO يقول...

السلام عليكم ورحمة الله وبركاته
والله المح في كلماتك الطيبة الشديدة
ماعلينا قصد العتاب وليس سوء النية
ماعلينا من الأخوة الطيبين النادرين جداً

بالنسبة لملتحي مصر وملتزميها وملتزماتها كان الله في عونهم

نسألك الدعاء

غير معرف يقول...

اولا جزاكي الله خيرا يا دكتورة علي زيارتك لمدونتي اثناء فترة مرضي

وربنا يديم عليكي نعمة الصحة

......................

اجابات اكثر من رائعة كما هو متوقع

Aml Ghonaim يقول...

الأخ بينو :
وعليكم السلام ورحمة الله وبركاته
وصلنى مفهومكما أنت والأخ ماعلينا ؛؛؛
جزاكم الله الجنة ؛
ولا حرمكم أجر الدلالة على الخير ....
بارك الله فيكم ...




الأخ مصراوى :
ازدانت صفحة التعليقات بزيارتك أخيراااا
لا بأس ؛طهور ان شاء الله ؛؛ وألف سلامة عليك
أسأل الله العظيم رب العرش العظيم أن يتم عليك شفائك ؛؛؛
وأن يرفع قدرك ودرجاتك ؛؛؛
ولا يحرمك الأجر ....
ونتمنى أن نرى لك زيارات قريبة ...
شفاك الله وعافاك ...

صانعة الحرية يقول...

السلام عليكم
يمكن دى اول مره ادخل مدونتك يا اموله بس ادينى بستكشف وباين عليها جميله ما شاء الله
وعجبتنى اجاباتك جدا ربنا يكرمك ويستخدمك فى نصرة دينه