الخميس، 15 نوفمبر 2007

تاج من صمود ....


تاج من الغالية ( صمود ) أسئلته صعبة بطريقة بشعة ؛ مش عارفة هعرف أجاوب عليه ولا الوضع هيكون ايه ... الله المستعان !
( لو )
مكنتش مصري بس عربي

كانت هتبقى إيه نظرتك للمصريين واللي بيحصل في مصر دلوقتي؟

والله احتمال كبير أكون مشغولة بنفسى ؛ أو على الكتير أبقى مشغولة باللى بيحصل فى بلدى – اللى أكيد مش هتختلف أوضاعها عن مصر كتيير _
وكنت هفضل أقول : ياه المصريين دول مساكين بشكل ! ازاى بلد جميلة زى مصر طلعت عظماء زى الأستاذ محمد عبده ؛ ومصطفى كامل ؛ والامام الشهيد حسن البنا ؛ و........... – يعنى انا بختار المشهورين على الساحة العربية – ازاى يوصل بيها الحال لكده ! بس أرجع أقول : والله كلنا فى الهم سوا ...

كنت أوروبي أو غير مسل
م بردو إيه نظرتك للعرب والمسلمين؟
لا حول ولا قوة الا بالله .... فى ايه ياجهاد ؟! ( غير مسلم مرة واحدة )!
أنا مسلم وأقولها ملء الورى ...... وعقيدتى نور الحياة وسؤددى .
بس لو كنت مسلمة أوروبية أكيد مش كنت بنفس الخلفية الثقافية اللى أنا فيها دلوقتى ؛ فمقدرش أحكم على حاجة مش متخيلاها !!!!
أما الخلفية الدينية فغالبا هتكون واحدة ومش عارفة ممكن تكون نظرتى : سبحان الله ! عندهم – المصريين يعنى – كل المقومات علشان يبقو مسلمين بجد ؛ بس برضه مش عايزين أو مش قادرين لكن بامكانهم يقدروا ... استدراكة لطيفة ( اللهم عافهم ولا تبلانا ) دى على لسانى وأنا أوروبية .


قالولك إنت بقيت رئيس جمهورية هتعمل إيه؟
يااااااه ... أخيرا حلمى تحقق !
بس يا آنستى انتى مش عارفة المشاكل دلوقتى كلها على مشروع حزب الاخوان بسبب النقطة الجوهرية دى ( جهاد جاسوسة ياجماعة !!!)
بس يلا هنعمل نفسنا بنتخيل على أساس ان لو ( تفتح عمل الشيطان )
أول حاجة هختار أحسن معمارى فى البلد يصمم لى قصر أحسن من بتاع الوليد بن طلال اللى طاير فى الجو !!!!
وهختار أجدد خط انتاج عربيات مرسيدس ( علشان الحرس والأمن وكده انتو عارفين )
وهسافر السودان أشوف رميساء صاحبتى ( حلم صغير ده )
وأهم حاجة الأول هطلع عمرة ( علشان مكة واحشاااااااانى اووى ) لا عمرة ايه حج احنا فى موسم الحج ؛ ومش مشكلة بقى يا أحمد نأجل الجواز شوية !!
؛؛؛؛

لا بجد بقى : لو قالولى انتى رئيسة جمهورية أول حاجة هرجع كل الحقوق لأصحابها( وأول حق : كل المحالين لمحاكمات عسكرية افرااااااااااااج ؛ وأعين محصلين -
جابيين-للزكاة _ علشان الأغنياء اللى بينسوها ياحرام – افتراض حسن النية - ؛ وهمنع الاستيراد تمامااااااا علشان الشعب اللى نايم ده يصحى ويبدأ يشتغل وبالمرة ادى الفرصة لمشروعات الشباب انها تلاقى مستهلكين .
أعتقد ان البطالة هى السبب الرئيسى لأن تدور حياتنا فى هذا المنعطف العفن .
الاعلام بقى هعين له ناس متخصصين . محتاج وقفة جامدة أووى ؛ هنلغى الأفلام والمسلسلات – اياها - وبرامج

المسابقات الهبلة ؛ والبديل : اعلام هادف

ههتم بالتنمية البشرية ؛ والفكرية والروحية للشعب كله علشان لما نطبق أحكام الشريعة الاسلامية فى كل حاجة يبقى فى استقرار ويقين أننا على الحق ...
هقولكم حاجة باختصار بدل وجع القلب ده : هتنازل عنها لشخص جدير بالرئاسة ( خالد مشعل مثلااااا ؛ خيرت الشاطر ).

كان ينفع ترجع طفل تاني وتخليك طفل علطول هترجع؟ وليه؟
ايوه هرجع ؛ علشان بابا – الله يرحمه – هيفضل عايش بقى ؛ وهيكون معايا على طووول .

إنت طبيب وعندك مريض ميؤوس من حالته أيهما تفضل انك تصارحه بالوضع وتقوله كل شيء بأمر الله في الاخر ولا تغرس فيه الامل لغاية لما يموت؟

لا ؛ هغرس فيه الأمل لغاية مايموت ( لاحياة مع اليأس ) وأساسا أنا ( أمل ) .

سمح لك برؤية الرسول عليه الصلاة والسلام وإنك تقوله كلمة واحدة بسأو جملة واحدة بس هتكون إيه؟

جملة واحدة بس !!!!!!! تيجى ازاى دى ؟!
ينفع جملتين طيب ؟!
الأولى : جزاك الله عنا خير ماجزى نبيا عن أمته .
والتانية : ادع لى بأن أكون معك فى الجنة ؛ وأن ييسر الله لى الطريق لذلك ...

خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون تصرفك إيه؟.
تفاءلوا بالخير تجدوه ( لااجابة ) .

طلعت القمرهتكتب إيه عليه؟
الله أكبر ؛ ولله الحمد .
بالعلم بل بالأدب ... تنال أعلى الرتب
فعش حياة العلما .... واقرأ صنوف الكتب
ودم على تواضع .... لا تفتخر بالنسب
كفاك أن تخرج من... دنيا الورى بالحسب .

كنا في عصر ازدهار الأندلس كنت تتخيل نفسك إزاي؟
فى بلاط الخلافة ؛ أنتظر كل علماء الأندلس لأتلقى العلم على يديهم .
وأدور بين حدائقها أكتب شعرا ونثرا .....

وأطوف بين مساجدها أعمر ايمانياتى وأشحن مكامن الجمال فى قلبى !!

يا اللـــــــــه ! اشتقت لها ....

أنا مررت التاج ده لحد وما جاوبش عليهأعمل فيه إيه؟:D
اعملى له تاج جديد ؛ ولا أقولك : المسامح كريم .

حد عنده أسئلة تانية بتبدأ بلو يضيفها ويجاوبها

أعتقد مفيش بعد كده سياااااااحة عايزة ايه ؟
لو ماكنتيش بنت كنت عايزة تكونى ولد ولا بنت ؟
طبعا ( ولا تتمنوا مافضل الله به بعضكم على بعض )
بس كان نفسى أبقى ولد ؛ علشان أخطب الجمعة ؛ وأسافر من غير محرم ... وأتلقى
العلم عن الرجال من دون حرج ... وبس !

مش عارفة بقى حاسة ان اجاباتى على التاج ده مش مركزة بس مش مشكلة ... يمكن لو افتكرت حاجة أرجع أكتبها !!!!!!!!
أمرر لمين بقى
بسم الله :
سنا الاسلام .
صيد الخاطر .
يقين النصر .
لسانها مولوتوف .
غريب .
وأستاذى الكريم ( عصفور المدينة ) .

هناك 24 تعليقًا:

همسة قلم يقول...

معلش بقى يااحمد نأجل الجواز

كاتباها ليه بخط نمنم ياأمل عايزين نفرررررررررررررح :d

اجاباتك جميلة زيك ياأمل

وأحلى حاجة مصنع المرسيدس حطيني في وزارة الاعلام بقى ومش تنسيني علشان المرسيدس ابقى اديها لاخويا واخد انا التويوتا :D

واحشاني جدا ياأمل :)

عصفور المدينة يقول...

جزاك الله خيرا يا أستاذة وبارك فيك ولا أدري كيف أجيب على هذا التاج بعد
إجاباتك الرائعة التي تحمل معاني الاعتزاز بالإسلام

يسر الله زواجك ويسر لك الحج أيضا

صيد الخاطر يقول...

هههههههههههههه
مش عارف ياامل كل ما آجي أجاوب على تعليق ليكي أو موضوع عندك بقعد أضحك م عارف ليه

يلا خير ربنا يضحك سني

ده حتى أختي كانت قاعدة جنبي وقعدت تضحك هيا كمان


ربنا يفرجك ياامل ويسعدك وييسر لنا ولك الخير


عجبني في اجاباتك
لماذا تريدين أن تكوني رجلا

بجد بورك فيكي
ونفع الله بك

وسلميلي على احمد كثيرا

الحلم العربي يقول...

ماشاء الله إجاباتك كلها مثلك جميلة

و طبعا طلب العلم واضح جدا في اجاباتك
بس عندي سؤال يا أمولة:
هو المفروض السلطة تكون في ايد اللى معاه المال و لا العلم؟
انا في رأيي العلم لأن العلم يقدر يجيب المال ...لكن المال ما يقدرش يجيب العلم لوحده

على العموم اجابات موفقة و لما تمسكي الرئاسة ما تنسيش صاحبتك يعني انا مش هقولك عربية مرسيدس انتى عارفة دول مترصصين تحت بيتنا انا بس عايزة اطلع الحج و ممكن تطلعينى انا السنة دي و تتجوزي و ابقى اطلعى انتى و أحمد السنة الجاية إن شاء الله

ربنا يتمم بخير و اشوفك أجمل عروسة قريبا إن شاء الله

غير معرف يقول...

ربنا يبارك فيكي

اجابات جميلة

متبقيش تنسينا بواحدة مرسيدس عيون يا امل الله يكرمك

:)

اشمعني احنا يعني جت علينا ووقفت
:)

سناالإسلام يقول...

معلش بقى يا أحمد نأجل الجواز
هفتن يا أمل
:)
إجاباتك رائعة يا أمل
وجزاكم الله خيرا على التاج وأجاوب عليه قريبا جدا إن شاء الله
أراك قريبا إن شاء الله
سناء

belal يقول...

llفعلا إجابة صادقة..المصريين دول مساكين بشكل
..

محمد يقول...

إجابتك فعلا جميلة وصادقة وربما لا أجد أكثر مما قلتيه في إجابتك ردا على تلك الأسئلة

يسر الله زواجك وبارك لك في زوجك ورزقك الذرية الصالحة

جزاك الله خيرا

Aml Ghonaim يقول...

أسماء :
ماشي ؛؛؛؛ عقبالك ياجميييل ...
واحنا نقدر نحط حد تاني على هرم الوزارةن ؛ انتي عارفة مقرش أثق فى حد تاني ؛ شكلى كده همسك بنفسي كل الوزارات _ والعربيات كماااااان _
انتي كماان واحشانى أكتر ....






أستاذي الكريم : عصفور المدينة
بارك الله لكم ؛ وجزاكم الجنة .....





محمد : عادى ده الطبيعي يعنى ؛ وبعدين الهانم منار قاعدة تضحك ؛ تعلق أحسن ...
كلهم بيسلموا عليكم ؛
ودعوااااااااااااااتكم ...

Aml Ghonaim يقول...

حبيبتى آية :
بتوحشينى داااااااااايما
السلطة أعتقد زي ماقلتى ؛ فى يدج صاحب العلم أفضل ؛ لأن العلم يأتي بالمال لا العكس ؛
طيب وسيادتك هتمسكي وزارة ايه ؟ التخطيط العمراني ؟ ولا ايه بالظبط ؟ ماااااشي نبقى نشوفلك كده وزارة الفنون .... ههههه





مصراوى اوى :
جزاكم الله خيرااا
ايه حكاية العيون دى ياجماعة ؛
كده مش هلاقى لنفسي واحدة .......




سنسونتى :
طيب ماخلاص شافها ..... هتفتني على ايه بقى ؟!
وحشتينى ياقمر ؛ وخلاااااااااااص ان شاء الله هانت وهشوفك قريب ....

Aml Ghonaim يقول...

بلال :
طبعا مساكين بشكل يثير الشفقة ؛
اللهم أحينا مساكين _ بس مش زي المسكنة اللى احنا فيها دى _
الله المستعااااااان ...




وضاح :
جزاكم الله خيرااا أخي الكريم ؛
وبارك فيكم .........

عصفور المدينة يقول...

أستاذة....قمت بالإجابة على التاج

الفقير إلى الله يقول...

ما شاء الله اجابات صريحه

محمد عبد الغفار يقول...

الأصرار فى الأجابات

الـفجـريـــة يقول...

الاجابات جميلة

بس التاج ده اثبتلى حاجة مهمة
انى لسه عندى نسبة ذكاء كويسة
طلعت لسه بفهم
:1

اصلى دايما لما كنت بسمع النشيد بتاع ابو خاطر
بالعلم بل بالادب

بفتكرك مع ان ولا مرة جبتى سيرته
بس انا كان رابط معايا كده

شوفتى الذكاء
:1

Aml Ghonaim يقول...

أستاذي عصفور المدينة :
جزاكم الله الجنة ........



شباب بيحب اسلامه :
بارك الله لكم ؛ وجزاكم خيرااااا



أ. محمد عبد الغفار :
جزاكم الله خيراااااااااااااااا

Aml Ghonaim يقول...

سمسمتي القمر :
ايه العسل ده كله ؟
ايوه بقى طمنيني ان لسه الروحانيات موجودة .....
( أحبـــــــــــك فــــــى اللـــــــــــه )

شقاوة شعب يقول...

اجباتك جميلة يا امل تدل على انك محبة فعلا لدينك ومعتزة به

بس ايه حكاية خالد مشعل هتخليه رئيس الجمهورية
طب اعملى حساب للجنسية طيب


شاركينى رأيك فيما نصحت به اقبال بركة نساء الاخوان

تحياتى حبيبتى
شيماء

FadFadA يقول...

لا أملك إلا أن أقول
ما شاء الله

محمد

ياسر أبوالعلا يقول...

وجدى ينفطر على "وجدى "
الشيخ وجدى غنيم تعرض لأزمة فى البحرين .. أكيد عارفينها .. عاوزكم تنورونى وتقروا تفاصيل شوية فى مدونتى ورقة وقلم
http://waraqawaqalam.blogspot.com/

غير معرف يقول...

جميل جدا والإجابات واقعية جدا

محمد عـنـانـى يقول...

جميل اوى الاسئله والاجابه ويارب تكونى
رئيس جمهورية
شكلك كده ناويه تنغنغى الشعب
واحنا الشعب موفقين
ويارب يحقق كل خير وينصر امتنا
ونكون احنا المصرين مصرين
مصر بتجرى فى دمنا
سلام موقت

آفاق الحرية يقول...

اجمل حاجة انك قلتي انك هتتنازلي لشخص يسحقها فعلال مثل خالد مشعل او خيرت الشاطر مع ان ده خيانة منك للشعب اللي اختارك
ونصيحة من اخوك سيبك من المرسيدس وخليكي شبابية خليكي مع الباسات
وياستي انا المهندس اللي هيبنيلك القصر بس اوعي تنسيني ساعتها

غير معرف يقول...

السلام عليكم
كل كتاباتك يا امل تدل انك
دكتورة وكريمة دكتور ودكتورة
وزوجة دكتور
حقيقي هنيئا لاحمد بك
بارك الله فيك يا املة بس ما تصدقيش انك بقيتي الرئيس بجد
انتبهي في كلمة مهمة جدا كانت في بداية التاج وهي
"لووووووووووووووووووووو"