الاثنين، 22 ديسمبر 2008

معيدة ( مع وقف التنفيذ)!!


الزمان : فجر الأحد 21 - 10- 2007


أنا مستيقظة - على غير العادة - بعد صلاة الفجر ؛ أجلس وحدي في غرفتي منشغلة تماما بما أمامي ..


تمر أختي فترى نور حجرتي مضاء ! تفتح الباب مندهشة : أمـــل ؟ عدى زمااان على المشهد ده ؟ كل ده قلق ؟!


أجبتها مسرعة : لا تتحدثي معي الآن .. مشغوووولة ... يلا شوفي شغلك ؛ واقفلي الباب وراك !


بعدها بساعة أو ربما أكثر أذهب لأمي : ماما : أنا قلقانة جداا ..


تأخذني أمي في حضنها الدافيء: عادي ياحبيبتي ! طبيعي جدااا . ان شاء الله ربنا يجري الحق على يديك ؛ وينطقك بالصواب -هذه دعوة أمي التي أحبها كثيراا والتي تطمئنني أكثر - خلي عندك ثقة في الله ثم في نفسك ..


أجيبها : طيب!ان شاء الله ! ربنا يسهل !


الساعة أصبحت السابعة ونصف تقريبا : أسأل أمي وأختي :ماذا أرتدي ؟


تضحكان معا : يابنتي لسه بدري ... معادك الساعة 9 !!!


أجيبهم : طيب ماالساعة دلوقتي 7 ونصف ؟
تضحك أمي كثيرااااااااااا وتقولي : اذا كان أيام الامتحانات ماكنتيش بتنزلي غير 10 الا 10 واللجنة بتبدأ 10 !


أقول : بس النهاردة غيييييييييييييييييير !!!


أصر على موقفي وأخرج مسرعة الى الكلية الساعة 8 ونصف ... وصلت في التاسعة الا ربع تقريبا .. دخلت المكتب ؛ فتحت الشباك ؛ وجلست أقرأ قليلا من القرآن .. ثم انهمكت في أوراقي ...


كـــــــــــــــــــــــــــــــــــــــــــــــــــــــل هذا كان من أجل : أول محاضرة ألقيها في حياتي !


كان عندي محاضرتين واحدة لسنة أولى والتانية لسنة تالتة .


طبعا بنات سنة تالتة كانوا في الكلية وأنا طالبة في رابعة ؛ وكتير منهم كان عارفني ؛ فكنت متوترة جدا بلقائهم ..


أما سنة أولى ؛ فحدث و لاحرج !! كل أنواع الغلااااسة الممكنة تلاقيها في بنات سنة أولى - الا من رحم ربي - الله المستعااان !!!


مــــر ذلك اليوم كطيف رائع في حياتي ؛ لازلت أذكر تفاصيله حتى اليوم ؛


كانت تجربتي الأولى في تدريس مادة غلسة - ليس لها أي داعي - لأننا ندرسها تقريبا في كل ترم الجانب النظري فيها تقريبا واحد ؛ المختلف هو الجانب التطبيقي ؛ وهي مادة ((( البحث ))) فبتزهق الواحد جداااااااااااااااااااا


لكن الحمد لله انطباع البنات كان مقبولا على حد ماسمعت ..


من طرائف ذلك اليوم :


بنات سنة أولى وأسئلتهم الظريفة : دكتورة هو انتي دكتورة بجد ؟


دكتورة هو انتي عندك كم سنة ؟


دكتورة انتي بقيتي دكتورة ازاي ؟


الزمان : اليوم الاثنين 22 - 12 - 2008


أظل متيقظة بعد صلاة الفجر لأن أحمد مسافر القاهرة ؛ أرتب لبسه وأشيائه ..... ثم أودعه - يسر الله له طريقه وحقق أمله -


أتجول في بيتي بعد أن ينزل ! لا أستطيع أن أنام لأن عندي كلية !


أفكر في ذلك اليوم الذي سردته لكم ؛ وأفكر في أن أكتب هذه التدوينة ...


لا أشعر بأية رغبة في الذهاب للمحروسة ( اللي اسمها مجازا كلية ) !!!


يارب!! !!!


في بداية هذه السنة كانت هذه القرارات من العميد :


- مفيش معيدات يدخلوا محاضرات .


- الحضور 3 أيام أسبوعيا من 9 ونصف ل 2 !!!


لا أدري عن بقية التعليمات الخاصة بشأننا ؛ لكن هذين الأمرين آذوني بشدة ؛


يعني ايه مش داخلين محاضرات ؟ طيب هنروح 3 أيام نعمل ايه ؟


المعيدات والمدرسات المساعدات يجتمعن في غرفة واحدة كل واحدة تقعد تكلم التانية عن حماتها !!!


في أول يوم قلت لنفسي : وبعدين بقى مش هنخلص من شغل الستات ده ؟ أنا وظيفتي ايه هنا ؟


أسأل المسئولة عن الامضاء : طيب احنا وظيفتنا ايه هنا ؟ تقولي : كلموا البنات !


نكلمهم فين بس ؟ مش عارفة ؛ ولو وقفت واحدة أكلمها عن لبسها مثلا هل هيبقى لي سلطة ولا مجرد وعظ ؟


لا اجابة عن أي شيء يخص هذا الأمر !!!!!


سألت أحمد بعدها بفترة وجيزة : كده المرتب اللي باخده حرااام ؟ علشان أنا مش بعمل حاجة في الكلية !


قالي : لا ؛ احنا بناخد مرتبات علشان يساعدونا على تكاليف اكمال الدراسة والكتب والبحوث .


اطمأنت نفسي قليلا .. لكن بعدها عرفت أننا نأخذ جزء كبير من مرتباتنا على ساعات العمل التي ندخل فيها محاضرات توعية !!!


ياسلاااام !!!!!! وهيا فين محاضرات التوعية دي ؟ معرفش ؟


طيب ندخل محاضرات قرآن كريم ... مفيش ...


ولا يبدوا أن هناك أملا ما في الأفق !


لم أجد أمامي الا المسجد ؛ كنت أجلس فيه والبنات يسألوني عن اللي مش فاهمينه. معتقدة أنني بذلك أحلل المال الذي أتقاضاه !!!!




ولم أعد أجد مأوى في كليتي - التي كانت حبيبة - !!!


أنا مخنوووقة أووي من اللي بيحصل في الكلية ده ؛ ونفسي أعمل أي حاجة فيها ... ماينفعش أكتر من 30 معيدة ومدرس مساعد يروحوا الكلية 3 أيام في الأسبوع من أجل كسب كثير من السيئات !!!!


دعوااااااااااااااااااااااتكم لي ...لأني لو مادخلتش محاضرات توعية أو عملت أي حاجة في الكلية دي في الفصل الدراسي الجاي هيحصلي حاجة !!! الله المستعاااااااااااااان !!!

هناك 15 تعليقًا:

خديجة عبدالله يقول...

سرد شيق ممتع مع إنك مخنوقة

سعدت جدا لوجود قلوب لازلت تهتم بأمر (تحليل القرش اللى بتاخده ربنا يباركلك ويجزيكى كل خير أختى الكريمة

مش عارفة ليه حاسة إنى أعرفك هوة انتى أمل صيدلة ولا أنا متلخبطة
عامة ولو مش أمل سعدت بمدونتك جدا وربنا يعينك ويرزقك الإخلاص ويتقبل منك

صيد الخاطر يقول...

ههههههههههههههه
ربنا يباركلك

سلميلي على احمد كتير كتير
وفي انتظار زيارتكم

ولا تتعجلي ايتها النخلة الطيبة
الاثمار

فكلما ظلت الثمرة في اكمام نخلتها
كلما لانت عريكتها وطاب طعمها وفاح عبقها

قريبا ان شاء الله يأتي اليوم الذي تدرسين فيه لآلاف الطالبات رغما عن انف عميدكم هذا

سلامي للجميع

ِِAdem El-Mahdy يقول...

ألسلام عليكم و رحمة الله

حضرتك فكرتينى بأول مرة ادى فيها محاضرات

كنت رايح مدرسة اولاد ، و كنت نازل أدى محاضرة عن اضرار التدخين و المخدرات تبع برنامج توعوى لمنظمة الصحة العالمية

فأمهم رجلى قادت تخبط فى بعضها و الكلام ده

لكن عدت

و بقت الحمد لله

اديت محاضرات قدام دكاتره جامعة ورساء شركات


و عادى

اهم حاجة بس حضرتك تكونى متنوعة فى الاسلوب و اعملى كسر حاجز نفسى بين حضرتك و بين الطلبة

زى طرفة او حتة نكتة خبر حلو
ايه
حديث

و ياريت تقرى فى ال
presentation Skills

حضرتك لو بحثتى فى جوجل هتلاقى مواد رائعة
انجليزى او عربى

و جزاكم الله خيرا

(صندوق الدنيا) يقول...

صبرا حبيبتي في الله
وأكثري من الدعاء((اللهم إستخدمني ولا تستبدلني))
وتأكدي أن مجرد تواجدك له أثر في الطالبات...ربما لا تشعرين كيف
ولكننا نستطيع أن نؤثر في الآخرين
بمجرد الصمت

آسو الحياة يقول...

عزيزتى أعانك الله على ما أنتى فيه وبشرك بالخير ويسر لكى أمرك 000ولكن عندنا فى الجامعه الازهريه المعيدات يدخلن عادى ويشرحن ومن قبل الدكاترة فلماذا لا تشتكون؟؟ ودمتى بخير

شهيدة يقول...

مش عيزه اعقدت اكتر بس مش قادره اسكت لازم اقول " يبقى انت اكيد اكيد في ... مصر "

مشروع انسان يقول...

ربنا يعينك يا فندم ويزيد حضرتك حرص على طاعته

يعنى للاسف فيه كتير فى الوظائف الحكومية اتعودوا على كده ياخدوا فلوس من غير شغل

بل ده اصبح العادى فى الحكومة

بس جميل ان حضرتك تبحثى وتتحرى ازاى ممكن تفيدى فى ظل هذا الحصار وهذا الاهمال

ربنا يعين حضرتك

عصفور المدينة يقول...

أعانكم الله اصبري

"النجم القادم" يقول...

بارك الله فيكى اختنا الفاضلة
ودكتورتنا القادمة

بجد جزاكى الله خيرا اننا نشوف واحده بتخاف على محاضراتها وعاوزه تحلل القرش اللى بتاخده مش عندنا فى الكليات بنلاقى الدكاترة مش بتيجى اساسا الا اخر محاضرات وتحدد المنهج وعك وليس كله كويس واللى يذاك يذاكر واللى ينجح ينجح

بجد بارك الله فيكى ربنا يبارك فى حضرتك

اتمنى تشريفنا بزيارتكم الكريمة

Aml Ghonaim يقول...

خديجة :
آمين ؛ وجزاكم الله خيراااااااا
هو أنا مش أمل صيدلة أنا أمل شريعة :) بس تسعدني معرفتك جدااا ..
بارك الله فيك غاليتي .. نورتي المدونة ...



محمد :
ربنا يسمع منك ياااارب
أحمد بيسلم عليكم كتييير وان شاء الله هنزوركم قريباا ... دعوااااااااااااتكم




آدم المهدي :
صح ؛ هيا أول مرة بس وربنا يعين ..
جزاكم الله خيرا كثيرا ..
شكرا لمروركم ...

Aml Ghonaim يقول...

أم البنين :
ردك كان كبلسم لي ...
جزاك الله الجنة ولا حرمك الأجر ...
( اللهم استخدمني ولا تستبدلني ) دعوتي الدائمة .. جعل الله لي ولك منها نصيب ...
نورتي ياغالية ...




آشوووو
والله ياحبيبتي مش عارفة هنشتكي لمين ؟ بس عندكم في الجامعة الأزهرية في مصر يعني ؟ ولا في مكان تاني ؟
نورتي المدونة ياقمر ...



شهيدة :
ما أنا عارفة ان احنا أكيد أكيد أكيد في مصر ...
الله المستعااان ..
دعواااااااااتك ...

Aml Ghonaim يقول...

امام الجيل :
هو حصار واهمال فعلا ...
الله المستعااان ...
جزاكم الله خيرااا
نحتاج لدعائكم ...




أستاذي الفاضل : عصفور المدينة :
وهل لنا الا الصبر ؟
جزاكم الله خيرااا على المرور .




النجم القادم :
أسأل الله أن يجعلني خيرا مما تظنون وأن يغفر لي ما لاتعلمون ...
جزاكم الله خيراااااا
شرفت بزيارتكم ...

بنت أبيها يقول...

ربنا المعين

ابدائي في التحضير بقى عشان تنتقلي من معيدة

ربنا يوفقك

وليد يقول...

الله اكبر ولله الحمد نعم نكبر لان النصر من عند الله نكبر لاننا ذقنا كاس الذل والهوان نكبر لان بنى جلدتنا خانونا وتامروا علينا نكبر لاننا على ثغر من ثغور الاسلام الله اكر على الظالمين الله اكبر على المحتلين الله اكبر على الذين يحاصروننا الله اكبر على من قتلونا من دمروا مساجدنا فماذا تنظرون الا تفيقون الا تستقيظون الا تفعلون شى لنا متى تفيقون متى متى متى ؟؟؟؟؟؟؟؟؟؟؟؟؟؟؟؟؟؟؟؟
شارك معنا برابطة هويتى اسلامية فى الصد عن اخواننا بغزة الرجاء الدخول على هذا الرابط ونشر الرسالة الموجودة فى مدونتكم
http://hawetyhawety.blogspot.com/2008/12/blog-post_28.html

صامدون رغم الخيانة

الحلم العربي يقول...

ربنا يفرج همك يا امل و يفرج هم الأزهر من الحصار المقام عليه كالحصار على إخواننا في غزة

و ربنا ينصر إخواننا في غزة و يرحمهم
ادعيلهم يا أمل ربنا يرفع عنهم و ينصرهم